La sidra asturiana ye, tamién, una cultura d’oxetos. La botella y el vasu sidra son elementos específicos, únicos, que formen parte de la so identidá visual, funcional y ritual. Nun se pue entender l’actu de sirvir y beber sidra ensin esti conxuntu simbólicu que ye tamién una herencia material del saber popular.
La botella de sidra tradicional asturiana ye la conocía como ‘molde fierru’ de vidru verde escuru, de boca ancha y forma cilíndrica, con capacidá de 0,7 litros. Esti diseñu, que nun cambió dende va décades, ta pensáu pa facilitar l’escanciáu vertical y permitir l’aireación rápida del líquidu al golpiar contra’l vasu.
El so usu xeneralizáu convirtióla nun iconu visual que remite enseguida a Asturies.
El vasu sidra, de boca ancha, paredes rectes y ente 12 y 13 cm d’altor, tien un diámetru de 9 cm y una capacidá media de 50 cl. Ye un vasu pensáu específicamente pal escanciáu, pa permitir que la sidra espalme y se lliberen los arumes y el gas natural.
El ritual del escanciáu y el consumu del culín (aproximadamente 100 ml que se tomen de manera inmediata) convierte’l vasu nun vehículu de socialización. Compartir el vasu, o respetar el turnu nel escanciáu, forma parte de les normes sociales implícites del chigre. L’usu del vasu y la botella, amás, son oxetos presentes en artesanía, ilustración y cultura visual popular asturiana.