El mundu del arte visual ye otru de los espacios onde la cultura sidrera asturiana espresa la so riqueza simbólica. Pintures, escultura, grabáu, fotografía y videocreación son medios nos que la sidra, los pumares y los llagareros son fonte d’inspiración pa artistes de toles xeneraciones.
En munches ocasiones, los elementos de la cultura sidrera apaecen representados como símbolos de pertenencia, identidá o reivindicación del mundu rural. Dende la clásica imaxe del escanciaor hasta interpretaciones más contemporánees de la mazana o del paisaxe sidreru, l’arte contribúi a reforzar y reinterpretar esti universu.
Nel casu de la pintura, l’arte asturianu vien amosando a lo llargo de sieglos un gran interés pol mundu sidreru. Artistes como Valle, Piñole, Moré, o Vaquero Palacios incluyeron motivos sidreros nes sos obres, creando escenes de chigre, mayada o trabayu na pumarada con fonda carga simbólica y estética. Tamién na pintura popular y etnográfica, la sidra ye un elementu recurrente.
Centros culturales, museos y coleutivos artísticos impulsaron esposiciones temátiques y proyeutos venceyaos a la cultura sidrera, demostrando que l’arte ye una ferramienta poderosa pa la tresmisión del patrimoniu inmaterial. Sidra y arte, xuntes, faen visible lo invisible y dan voz a una tradición viva.
La Fundación Asturies XXI caltién una Fototeca de la sidra, con elementos gráficos previos a 1980, y lleva dieciseis años convocando’l Concursu Internacional de Semeyes LA SIDRA, y realizando esposiciones coles ganadores.