Echar la sidra ye una téunica y un arte. Trátase de sirvila dende una altura determinada pa que rompa escontra’l borde del vasu y llógrase qu’oxixene y suelte’l so arume.
Echar sidra esixe precisión, conocencia y destreza. Arriendes d’ello, ye una forma d’espresar l’amor pola sidra y la tradición, y amás, ye un espectáculo en sí mesmu que forma parte del ritual social de compartir sidra.
Echar sidra ye un arte reconocíu, y los campeonatos de escanciadores cuenten con una importante participación y seguimientu. Los campeonatos oficiales d’escanciadores, con reglamentos estrictos y sistemes de puntuación, fomenten la escelencia y dignifiquen la profesión Al empar, l’escanciaor profesional y l’espontaneu son figura d’un pueblu que vive la sidra non como
rutina, sinón como celebración compartida.
L’escanciaor/a ye muncho más qu’una persona que sirvi sidra. Ye guardián d’un arte, embaxaor de la tradición y pieza clave de la cultura sidrera asturiana. La so postura, seguridá y movimientu reflexen años de práutica y dedicación.
Cada culín escanciáu tien de bebese enantes de que la sidra pierda les sos propiedaes. Esa dinámica de sirvir, apurrir el vasu direutamente del echador/a al que bebe y compartir el vasu convierte l’actu de tomar sidra nun exerciciu de comunidá, onde se comparte tiempu, conversación y cultura.