Ensin dubia, la reconocencia pola UNESCO de la Cultura Asturiana de la Sidra como Patrimoniu Cultural Inmaterial de la Humanidá supón un fitu na historia de la sidra asturiana, y tamién de la sidra en xeneral, en tantu supón reconocer qu’al rodiu d’esti productu xenérase un entornu cultural específicu.
Esti reconocimientu de la UNESCO ye motivu de satisfación pa tolos asturianos/es y amantes de la sidra de tol mundu, pero tamién implica un compromisu pa garantizar el so caltenimientu y desarrollu, una xera na que ta implicada’l conxuntu de la sociedá asturiana.
En cuantes a la presencia de la sidra asturiana a nivel internacional, hai de destacar qu’anque yá entamó nel sieglu XIX, nos tiempos caberos ta desarrollándose permuncho, con presencia de sidra asturiana n’eventos internacionales y cola realización -dende va 15 años- del Salón Internacional de les Sidres de Gala, que fai d’Asturies puntu d’alcuentru de sidres de tol mundiu.
Per otru llau, la Rede Europea de Ciudaes de la Mazana y la Sidra anicióse n’Asturies esti añu, cuntando cola participación de conceyos asturianos y tamién del País Vascu, Canaries, Portugal, Francia, Italia y Chequia, siendo un apueste fundamental na promoción internacional de la sidra y la so cultura.
Esta espublización cuenta con subvención de la Conseyería de Cultura, Política Llingüística y Turismu del Principáu d’Asturies